住院@4日3夜

住院@4日3夜

DAY159-162。29-JAN to 01-FEB-2015

4個月針打完後,隔左1星期左右就發燒
帶左去睇兒科,話係感冒,但完全無鼻水徵狀
醫生解釋屋企人有人病會傳染比BB
感冒未必會即刻有鼻水,因為BB無乜抗拒力
所以一黎就係發燒都唔出奇
咁岩表姐係感冒係咁流鼻水
食左D藥又好番D,,,但停左藥又燒





再睇多次都話係感冒,唔食又燒,,係低燒
我地懷疑係出牙仔,因為佢係咁流口水
半日無燒,所以無再食藥
當晚突然成身凍到打冷震,跟住就燒,仲係高燒,食完d藥又退左
唔對路,第2朝轉睇另1個醫生
醫生問耳仔有冇發炎?喉嚨有冇痛?PATPAT有冇紅?

問起先諗到patpat既問題
換左綠P片,綠P片d質地好粗糙(有懷疑係水貨)
自從用左後,每次poopoo完就會紅
醫生叫打開比佢睇,佢懷疑係尿道炎
開左d抗生素,要留尿去check下,keep住發燒,
痴尿袋好難幫佢留尿,郁得好犀利
到晚上又係無啦啦震..我地好驚 即刻帶佢入院檢查

DAY159-8.5kg 65cm
去左港安,等等下11點幾,醫生話要留尿種菌
當時唔知咩菌好嚴重,所以入院都要做快速抽鼻,

睇下有冇個隻菌...有要隔離...

棉花糖比佢抽完喊左幾聲 我攬住佢好快訓左
個時都1點幾,我同棉花糖都好多晚無訓
做哂入院手續,婆婆&爸爸番屋企,我留係度陪訓
望住佢訓左..我都唔安心訓,擔心佢夜晚又燒



第2日朝早兒科醫生巡房,留左尿去種菌
要打吊針落藥+抽血
帶佢去抽血,每邊手一下,每邊腳又一下
我係出面聽到心都痛,眼濕濕...姑娘叫我入去
話佢血管幼抽唔到 OMG 個下我忍唔住話
"抽唔到你唔應該夾硬黎呀"佢仲問我試唔試多幾次
仲試…我話唔試啦..佢話等醫生晏d黎到再睇下點
我無答佢地,,抱起棉花糖出左去
棉花糖好乖無喊,,我就忍唔住流左幾滴眼淚
姑娘入黎解釋番.."因為想一次過打吊針,咁就唔洗佢痛咁多下
不過bb血管,所以先吉咁多下
但仲未抽到血 bb要搵發燒源頭就一定要抽血
我明白作為媽媽會好心痛 "… … …跟住講左一堆野

其實點都要抽..啦啦聲抽完出報告就可以早d出院
今次我陪住佢抽,3個姑娘禁住d手,腳,頭
仲有1個就抽血..唔怪得喊到咁慘...
頭先佢1定好驚,佢望住我求救個樣,,我個心勁痛
摸住佢面仔同佢講"唔洗驚,媽媽係度媽媽係度"
抽得好慢,可能棉花糖唔肯飲奶+水
抽到一半,姑娘話只驗到一樣野,另一樣野驗唔到,問可唔可再抽?
我話唔抽啦..驗最重要個樣先啦

5塊膠布 真係好肉痛 情願病係自己
之後醫生巡房都話”陰工啦,唔好再抽,直接打抗生素針+食藥”
咁點解唔一早咁做呢?又打多下 total今日比人吉左六下



當日就無再燒 (後尾諗番吊唔到支針都係好事架,我生棉花糖時要吊住
好唔方便,隔一陣姑娘又要打鹽水清1清,每次打都唔舒服)
可能棉花糖想方便我地照顧,所以抗拒唔比吊到 HAHA

第3日都無咩事,仲好精神添
5點幾起身係咁摸我塊面笑住"下,嗯,下,嗯"(最近識既音)
食完奶,好精神碌黎碌去






糖爸黎探病時我仲訓緊..好攰



糖爸話接力比我周圍行下郁動下,
點知佢都係攬住棉花糖訓,
唔通棉花糖有魔力攬住佢就zzz 哈哈哈



第4日報告出哂話驗唔到係尿道炎
可能食左抗生素打敗左d菌
醫生有2個建議
 1)已經退左2日燒,無翻發,應該就ok
但保險d可以超聲波照埋d器官有冇問題,咁就安心d
2)可以再抽血+膀胱抽尿...再化驗就準確d知道咩原因
我當然揀1啦..不過要安排到下晏先照到,maybe拖拖下就要後日先出院
我要求今日想出院,後尾超聲波有位啦啦聲照
報告出埋一切正常,醫生簽埋名走得
即刻搭的士回家,,番到屋企係最舒服

最後,報告都無顯示係咩事,最大可能係尿道炎
anyway無事就好...棉花糖要健健康康成長

d片我扔哂...唔知關唔關事?or 心理作用...
之後買片都係去萬寧,惠康, 一田,吉島買 用白P 花王
等大多少少先去番藥房買